Ağsu rayonunda 8 Noyabr - Zəfər günü silsilə tədbirlərlə qeyd edilir

Ağsu rayonunda 8 Noyabr - Zəfər günü silsilə tədbirlərlə qeyd edilir. Belə ki, 8 noyabr - Zəfər Gününün beşinci ildönümü ilə əlaqədar Qəhrəmanlar Kompleksi və Şəhidlər Xiyabanı ziyarət olunub. Ağsu Rayon İcra Hakimiyyətinin başçısı Rövşən Bağırov, Milli Məclisin deputatı Elçin Mirzəbəyli, rayonun hüquq-mühafizə orqanlarının rəhbərləri, ağsaqqallar, ziyalılar, şəhid ailələri, Vətən Müharibəsi iştirakçıları, gənclər, ictimayyət nümayəndələri Qəhramanlar Kompleksinə gəliblər, əklil və gül dəstələri qoyaraq qəhraman Vətən oğullarının xatirəsini ehtiramla yad ediblər.
Xebercimedia.az xəbər verir ki, RİH başçısı Rövşən Bağırov şəhid ailələri, Vətən müharibəsi iştirakçıları ilə göşürək onları Zəfər günü bayramı münasibətilə təbrik edib, qarşılaşdıqları çətinlik və problemləri ilə maraqlanıb. RİH başçısı çıxış edərək 2020-ci il sentyabrın 27-də başlanan və Prezident, Ali Baş Komandan cənab İlham Əliyevin rəhbərliyi ilə qısa vaxtda Qələbə ilə başa çatan Vətən müharibəsinin tarixi əhəmiyyətindən danışılıb. Vurğulayıb ki, qədim mədəniyyət mərkəzi olan Şuşa şəhərinin və onun işğaldan azad edilməsinin tarixi əhəmiyyəti baxımından xalqımız bu qədim şəhərin azad olunduğu günü, 8 Noyabr- Zəfər gününü təntənə ilə qeyd edir.
Ziyarətdə iştirak edən Vətən müharibəsi şəhidlərinin ailələri, müharibə iştirakçıları dövlət tərəfindən onlara göstərilən diqqət və qayğıya görə minnətdarlıqlarını bildiriblər.
Sonra tədbir iştirakçıları Ağsu şəhərindəki Şəhidlər Xiyabanına gələrək orada ağsulu şəhidlərin məzarlarını ziyarət ediblər, məzarların önünə tər gül-çiçək dəstələri düzmüşlər.