Ağsu rayonunda “27 sentyabr - Anım Günü”nün beşinci ildönümü silsilə tədbirlərlə qeyd olunur

Ağsu rayonunda “27 sentyabr - Anım Günü”nün beşinci ildönümü silsilə tədbirlərlə qeyd olunur. Belə ki, 26 sentyabr 2025-ci il tarixdə YAP Ağsu rayon təşkilatının inzibati binasında “Qəhrəmanlıq tariximizin şanlı səhifəsi” mövzusunda konfrans və Ağsu-Rəhimli-Qaradağ avtomobil yolunun 1,5-ci kilometrliyində ağacəkmə aksiyası keçirilib.
Xebercimedia.az xəbər verir ki,Tədbirlərdə Ağsu Rayon İcra Hakimiyyətinin başçısı Rövşən Bağırov, Milli Məclisin deputatı Elçin Mirzəbəyli, rayonun hüquq-mühafizə orqanlarının rəhbərləri, şəhid ailələri, müharibə iştirakçıları, ziyalılar, ağsaqqallar və rayon ictimaiyyətinin nümayəndələri iştirak ediblər.
YAP Ağsu rayon təşkilatının inzibati binasında təşkil olunan konfransda əvvəlcə şəhidlərin əziz xatirəsi bir qəqiqəlik sükutla yad edilib, sonra rayon məktəblilərinin ifasında şəhidlərə həsr olunmuş şeir kompazisiyası nümayiş etdirilib.
Yığıncaqda Ağsu Rayon İcra Hakimiyyətinin başçısı Rövşən Bağırov çıxış edərək Azərbaycan Respublikasının müstəqilliyi və ərazi bütövlüyü uğrunda canından keçən şəhidlərimizin xatirəsinin hər birimiz üçün əziz olduğu, xalqımızın qəhrəman övladları ilə qürur duyduğu xüsusi vurğulayıb. Prezident, Müzəffər Ali Baş Komandan cənab İlham Əliyevin rəhbərliyi altında 44 günlük Vətən müharibəsində Ermənistan silahlı qüvvələrinin törətdikləri genişmiqyaslı təxribatın qarşısı alınarkən şanlı tarix yazan oğullarımızın, şəhidlərimizin, qazilərimizin döyüş yolundan söz açıb, onların hər birinin bir qəhrəman olduğunu və bu gün hər kəsin onlarla fəxr etdiyini, qürur duyduğunu bildirib.
Digər çıxışlarda böyük Zəfərin qazanılmasında xalqı vahid ideya ətrafında birləşdirməyə nail olan Müzəffər Ali Baş Komandan cənab İlham Əliyevin siyasi iradəsinin, Azərbaycan əsgərinin igidliyinin və Azərbaycan xalqının həmrəyliyinin əvəzsiz rol oynadığı vurğulanıb, şəhidlərin xatirəsinə ehtiram və minnətdarlıq ifadə olunub, qazilərə şəfa dilənib.