Ağsu Rayon Mərkəzi Xəstəxanasının adını daşıdığı şəhid həkim Şahin Quliyev Tarverdi oğlunun bugün şəhadətə ucaldığı gündən 31 il ötür

Ağsu Rayon Mərkəzi Xəstəxanasının adını daşıdığı şəhid həkim Şahin Quliyev Tarverdi oğlunun bugün şəhadətə ucaldığı gündən 31 il ötür. Bununla bağlı Ağsu Rayon Mərkəzi Xəstəxanasında tədbir keçirilib.
Xebercimedia.az xəbər verir ki, Tədbirdə Ağsu Rayon Mərkəzi Xəstəxanasının direktoru, kollektivi, Ağsu Rayon İcra Hakimiyyətinin nümayəndələri və şəhidin ailə üzvləri iştirak ediblər.
Tədbiri giriş sözü ilə açan direktor Gülnarə Muxtarova həkim Şahin Quliyev haqqında çıxış edib, şəhidin ailə üzvlərinə minnətdarlığını bildirib. Daha sonra həkim Şahin Quliyevlə birgə fəaliyyət göstərmiş həkimlərimiz öz həmkarları haqqında çıxışlar edərək şəhidimizi yad edərək bildiriblər ki, şəhid həkim Şahin Quliyev yalnız bir həkim kimi deyil, eyni zamanda vətənin əsl fədaisi kimi yaddaşlara həkk olunub. Onun göstərdiyi şücaət, mərdlik və insanlara olan sevgisi hər kəs üçün nümunədir.
Qeyd edək ki, Şahin Quliyev Tarverdi oğlu 10 yanvar 1956-cı ildə Ağsu rayonunun Gəgəli kəndində anadan olub. 1962-1973-cü illərdə Gəgəli kənd orta məktəbində təhsil alıb.
1980-ci ildə Azərbaycan Tibb Universitetinə daxil olub, 1987-ci ildə həmin universiteti terapevt həkim ixtisası üzrə bitirib.1987-ci ildə avqust ayından Ağsu rayon Gəgəli KHA-da baş həkim vəzifəsinə təyin olunub.
19 noyabr 1993-cü ildə hərbi xidmətə çağırılıb, vətənpərvər həkim Şahin Quliyev 13 may 1994-cü ildə ön cəbhələrdə döyüşlərdə qəhrəmancasına öz xidməti vəzifəsini yerinə yetirərkən şəhid olub.
Sonda şəhidin büstünün önünə gül dəstələri qoyulub.
Qəhrəmancasına şəhid olan həkimimizi dərin hörmət və ehtiramla anırıq!
Allah bütün şəhidlərimizə rəhmət eləsin.