Ağsuda "Narkomaniyaya yox deyək!" və "Erkən nikahın fəsadları" mövzularında genişmiqyaslı maarifləndirmə tədbiri keçirildi

​Ağsu rayonunun Padar kənd tam orta məktəbində gənc nəslin sağlam ruhda böyüməsi, zərərli vərdişlərdən uzaq durması və erkən nikahların qarşısının alınması məqsədilə "Narkomaniyaya yox deyək!" və "Erkən nikahın fəsadları" mövzularında genişmiqyaslı maarifləndirmə tədbiri keçirilib.
​
​Xebercimedia.az xəbər verir ki, Tədbirdə hüquq-mühafizə orqanlarının nümayəndələri çıxış edərək mövzunun ciddiliyini faktlarla diqqətə çatdırıblar:

​Polis mayoru Emin Cavadov (Ağsu RPŞ-nin rəis köməkçisi): Çıxışında narkomaniyanın insan sağlamlığına və mənəviyyatına vurduğu sağalmaz yaralardan bəhs edərək, gənclərin bu "ağ ölüm"dən qorunması üçün polis-ictimaiyyət birliyinin vacibliyini vurğulayıb.

​Polis baş leytenantı Ağacan Ələbbasov (İTB-nin YYÇPİTQ-nun inspektoru): Erkən nikahların həm tibbi, həm də hüquqi fəsadları barədə ətraflı məlumat verib. Yetkinlik yaşına çatmayan qızların təhsildən yayınmasının və vaxtsız qurulan ailələrin gələcəkdə yarada biləcəyi sosial problemləri xüsusi qeyd edib.
​
Tədbirdə yalnız məktəbin şagird və müəllim kollektivi deyil, həmçinin kənd sakinləri və valideynlər də fəal iştirak ediblər. Bu da məsələnin kənd icması səviyyəsində nə dərəcədə əhəmiyyətli olduğunu bir daha sübut edib.
​
​Görüşün sonunda şagirdləri maraqlandıran suallar cavablandırılıb və mövzu ilə bağlı videoçarxlar nümayiş etdirilib. Tədbir iştirakçıları bu cür görüşlərin mütəmadi keçirilməsinin gənclərin düzgün yol seçməsində böyük rol oynadığını qeyd ediblər.