Bu ölkədə əsgərləri robotlar əvəz edəcək

Cənubi Koreyada kəskin demoqrafik böhran və əhali sayının azalması fonunda ordunun müdafiəsi "Hyundai" robotlarına həvalə edilə bilər.

Bu barədə "Bloomberg" agentliyi məlumat yayıb.

Rəsmi Seul hərbi xidmətə çağırılanların sayının sürətlə azalması problemini həll etmək üçün süni intellektlə idarə olunan pilotsuz sistemlərə investisiya qoyuluşunu sürətləndirir. Ölkə ordusu robotların döyüş tapşırıqlarından kənar sahələrdə, xüsusilə müşahidə, kəşfiyyat və logistika işlərində istifadəsini nəzərdən keçirir.

Məqalədə qeyd olunur ki, potensial variantlar arasında "Boston Dynamics" şirkətinin dörd ayaqlı Spot robotu, dörd təkərli MobED mobil droidi və X-ble Shoulder ekzo-skeleti kimi geyilə bilən platformalar yer alır.

Qeyd edək ki, rekord dərəcədə aşağı doğum səviyyəsi səbəbindən son altı ildə Cənubi Koreya Silahlı Qüvvələrinin şəxsi heyətinin sayı 20% azalaraq 450 min nəfərə düşüb. Müdafiə Nazirliyinin proqnozlarına görə, 2040-cı ilə qədər bu rəqəm daha da azalaraq 350 min nəfərə çatacaq.